Sonntag, 16. Dezember 2012

အနှောင်အဖွဲ့

သာဝတ္ထိမြို့တွင်းသို့ ဆွမ်းခံဝင်လာကြသော ရဟန်းတော်တို့သည် လမ်းတွင် လုယက်မှု၊ ဖောက်ထွင်းမှု၊ လူသတ်မှုတို့ဖြင့် ဖမ်းထားသော တရားခံများကို သံခြေချင်းခတ်ခြင်း၊ လက်ပြန်ကြိုးတုပ်ခြင်း၊ ထိတ်တုံးခတ်ခြင်း စသော အချုပ်အနှောင် အမျိုးမျိုးတို့ဖြင့် ခေါ်ဆောင်လာသည်ကို တွေ့မြင်ခဲ့ကြ၏။

ဇေတ၀န်ကျောင်းတော်သို့ ပြန်ရောက်သောအခါ တရားသဘင်၌ ထိုရာဇ၀တ်သားများ အကြောင်းကို မြတ်စွာဘုရားအား လျှောက်ထားပြီးလျှင်၊
"အရှင်ဘုရား- ဤအနှောင်အဖွဲ့တို့ထက် ခိုင်မြဲသော နှောင်ဖွဲ့မှုများ ရှိပါသေးသလော"ဟု လျှောက်ထားကြ၏။

ဘုရားရှင်က . .
"ရဟန်းတို့ - သင်တို့မြင်ခဲ့သော အနှောင်အဖွဲ့သည် ဘာမျှ မဟုတ်သေး၊ အစားတဏှာ၊ အ၀တ်တဏှာ၊ ပစ္စည်းဥစ္စာတဏှာ၊ သားသမီးဇနီးခင်ပွန်းတဏှာ များသည်သာ လက်ထိတ် ခြေချင်း သံကြိုးတို့ထက် အဆရာထောင်ပို၍ နှောင်ဖွဲ့ကြ၏" ဟု မိန့်တော်မူကာ အောက်ပါဒေသနာတို့ကို ဟောကြားတော်မူလေသတည်း။

"သံဖြင့်ပြုလုပ်သော အနှောင်အဖွဲ့၊ သစ်သားဖြင့် ပြုလုပ်သော အနှောင်အဖွဲ့နှင့်၊ မြက်လျှော်တို့ဖြင့် ပြုလုပ်သော အနှောင်အဖွဲ့တို့ကို၊ ခိုင်မြဲသော အနှောင်အဖွဲ့ဟူ၍ ပညာရှိတို့ မဆိုကုန်။"

"ပတ္တမြားနားတောင်း စသော ရတနာတို့၌၎င်း၊ သားသမီး မယားတို့၌၎င်း၊ လွန်စွာတပ်နှစ်သက်တတ်သော၊ ငဲ့ကွက်တတ်သော တဏှာကိုသာ၊ အနှောင်အဖွဲ့ဟု၊ ပညာရှိတို့ဆိုကုန်၏။"

"ယုတ်နိမ့်ရာဘ၀သို့ ဆောင်ယူတတ်သော ဤအနှောင်အဖွဲ့တို့သည် ဖွဲ့မှန်းမသိ ဖွဲ့ထားသဖြင့် လျော့ရဲဟန်ရှိသော်လည်း လွတ်မြောက်ရန် ခဲယဉ်းလှ၏၊ ပညာရှိတို့သည် ဤအနှောင်အဖွဲ့တို့ကို ဖြတ်တောက်ကာ ကာမချမ်းသာကို ပယ်စွန့်လျက် တောထွက် ကျင့်ဆောင်ကြကုန်၏။"

( ဓမ္မပဒ၊ တဏှာဝဂ်၊ ဗန္ဓနာဂါရ၀တ္ထု )

Keine Kommentare:

Kommentar veröffentlichen